مأساة في المعادي: وفاة شاب في حادث مروع ووالده يكشف اللحظات الأخيرة

شهدت منطقة المعادي حادثًا مأساويًا أسفر عن وفاة شاب في مقتبل العمر ، بعدما صدمته سيارة تسير بسرعة مروعة دون أن يتوقف قائدها عقب الحادث ، في مشهد مؤلم وثّقته كاميرات المراقبة وأثار حالة من الحزن الشديد بين الأهالي .

وقال والد الشاب ، في تصريحات خاصة ل مصر تايمز ، إنه وصل إلى موقع الحادث بعد دقائق قليلة ، ليفاجأ بأن سيارة الإسعاف قد نقلت جثمان نجله ، مضيفًا :

" الضابط قالي تعالا على قسم المعادي ، وآثار الحادث كانت واضحة من شكل الإسكوتر والعربية ، كانت عربية عالية ، والولد اتوفى في نفس اللحظة .. الله يرحمه " .

وأضاف الأب بصوت يملؤه الألم :

" واحد من الناس اللي شافوا الحادث قال لي إنهم عدّلوه من على الأرض ، كان واقع على وشه ، ولما لمسوه لقوه في الروح .. اتشهد ورفع صباعه ومات . 

طلبنا رقم الإسعاف ومعانا فيديو بيظهر كل حاجة . 

السائق اللي عمل الحادث مواقفش ، ولا حتى داس على فرامل ، كمل لحد ما دخل في أوتوبيس تابع لشركة كان راكن هناك ، وخبط كمان في تاكسي واقف " .

وتابع الأب :

" كمان كان فيه كلب بلدي قاعد جنب الرصيف خبطه معاه ، وأول ما السواق نزل قال ( أنا غفلت .. أنا نمت ) . 

الناس كلها شافته ، والشهود أكدوا إنه كان ماشي بسرعة جنونية في شارع فيه 6 حارات . 

ابني كان واقف على الرصيف بالإسكوتر بتاعه ، بيكلم واحد بيقوله ( أنا عطلان أعمل إيه ) ، وفجأة العربية دخلت فيه " .

وأوضح أن السائق حاول الهروب بعد الحادث ، قائلًا :

" الناس مسكوه من الشارع الناحية التانية ، وكان بيحاول يركب عربية سيادية جت له مخصوص ، بس الناس وقفت قدامها ومنعوه . 

لما رجعنا الفيديوهات من الكاميرات ، اكتشفنا إنه مكمل وما وقفش ، واللي وقفه فعلاً كانت الأوتوبيسات اللي خبط فيها . 

في ناس قالت الكاوتش ضرب ، بس دا مش حقيقي ، هو كان بيلعب في الطريق وساق بإهمال ، وأول ما الناس حاصرته قالهم ( أنا غفلت ، أنا غفلت ) ، وبدأ يعمل تليفوناته كأنه مش عامل حاجة " .

واختتم الأب حديثه والدموع تملأ عينيه قائلًا :

" ابني مات شهيد ، الناس كلها قالت كده ، لقوه بينطق الشهادة ومات .

نفسي بس آخد حقه ، وأشوف اللي عمل كده بيتحاسب " .

وتواصل الأجهزة الأمنية بالقاهرة جهودها لكشف ملابسات الواقعة وضبط المتسبب في الحادث تمهيدًا لاتخاذ الإجراءات القانونية اللازمة . 

لمتابعة التفاصيل الكاملة حول مأساة في المعادي: وفاة شاب في حادث مروع ووالده يكشف اللحظات الأخيرة، يمكن الرجوع إلى موقع مصر تايمز عبر رابط الخبر الموجود أسفل النص، وذلك حرصًا على وصول القارئ للمصدر الأصلي.