مصطفى عباس يكشف كواليس دوره في "كلهم بيحبوا مودي" ويؤكد: شقي الحارة يجسد روح المصريين البسطاء
كشف الفنان مصطفى عباس، عن كواليس مشاركته في مسلسل كلهم بيحبوا مودي بطولة الفنان ياسر جلال، الذي من المقرر عرضه خلال موسم دراما رمضان المقبل 2026.
واختص الفنان
"مصر تايمز"
للحديث عن تفاصيل الشخصية التي يُقدمها في مسلسل كلهم بيحبوا مودي، وعن سبب حماسه للعمل، متطرقًا إلى كواليس تعاونه مع النجم ياسر جلال والمخرج أحمد شفيق في هذا العمل، وإلى نص الحوار.
في البداية.. حدثنا عن شخصيتك في مسلسل كلهم بيحبوا مودي؟
الشخصية اللي بقدمها قريبة جدًا من الواقع وطبيعة الحياة المصرية، وبالتحديد من جو الحارة الشعبية، وأجسد دور شاب شقي من الحارة، وده اللي جذبني في العمل، لأنه بيوصل روح الناس البسيطة اللي بنشوفها في الشارع كل يوم.
و اللي شجعني أكتر هو إن دي أول مرة أشتغل مع النجم ياسر جلال، ودي كانت أمنية عندي من زمان، لأنه ممثل محترم وشاطر، وأي حد بيحب التمثيل معاه بجد لازم يتمنى يشتغل معاه.
هل الشخصية قريبة منك في الواقع؟
ليست قريبة مني في الواقع، لكن قريبة مني كممثل، يعني قدمت شخصيات شبهها قبل كده، لكن كل مرة بحاول أضيف عليها حاجة جديدة.
وأنا مولود في شبرا، وهي منطقة شعبية فعلاً، لكن عمري ما كنت شقي أو بلطجي، فالشخصية بعيدة عني في الحقيقة، إنما فيها روح أعرفها كويس.
كيف تحضرت للشخصية قبل التصوير؟
اشتغلت عليها كويس جدًا، وحاولت أبتكر تفاصيل تميزها عن أي شخصية قدمتها قبل كده، زي طريقة المشي، وقصة الشعر، وطريقة الكلام، وبحب أمنح لكل شخصية لمسة خاصة، حتى لو الدور بسيط، لازم يكون له تأثير.
ما هي فكرة مسلسل كلهم بيحبوا مودي بشكل عام؟
المسلسل يتناول فكرة كوميدية اجتماعية بسيطة، تحكي عن رجل غني جدًا يتعرض لمطب يخليه فقير، ومش بيقدر يخرج منه غير لما يتجوز واحدة غنية ترفعه.
بس المصادفة إنه يتجوز من حارة شعبية، ومن هنا تبدأ المفارقات والمواقف المضحكة، اللي في نفس الوقت فيها رسائل حقيقية عن الفرق بين الطبقات.
حدثنا عن كواليس التصوير مع النجم ياسر جلال؟
ياسر جلال نجم كبير وقمة في الذوق والاحترام، وأنا مبحبش أشتغل غير مع ناس تحسسني إني ممثل شاطر وتقدر موهبتي، وده لقيته معاه جدًا، هو يعترف بزملائه ويشجع الكل، وده يخلي أي ممثل يشتغل وهو مرتاح ومتحمس.
حدثنا أيضًا عن كواليس تعاونك مع الفنانة ميرفت أمين ومحسن منصور؟
أستاذة ميرفت أمين تعاملها راقٍ جدًا وأخلاقها عالية، وأنا سعيد إن ليا مشاهد معاها، أما أستاذ محسن منصور فده أخويا الكبير وصاحب عمري، وفرحان جدًا إننا بنشتغل سوا في المسلسل ده.
وما هي علاقتك بالمخرج أحمد شفيق؟
أستاذ أحمد شفيق من الناس اللي ليهم فضل عليا، اشتغلت معاه من زمان أيام ما كان مساعد مخرج، ودلوقتي بقى مخرج كبير ومحترم، هو لما يشوفني في حاجة كويسة بيجيبني ومش بينساني، وبحب أشتغل معاه لأني ببقى متطمن إنه هيخرج مني أداء حلو ويطلع أحسن ما عندي.
هل لديك معايير معينة لاختيار أدوارك؟
أنا بحب التنوع، مبحبش أتحصر في نوع واحد من الأدوار، في موسم بعمل شخصية جادة أو حزينة، وموسم تاني بعمل شخصية كوميدية، المهم عندي إن الدور يكون مختلف ويضيف لي، مش مجرد مشاركة فقط.
وبالنسبة للسينما.. هل في أعمال جديدة قريبة؟
اتعرض عليا أكثر من دور في السينما خلال الفترة اللي فاتت، لكن رفضتها لأنها كانت أدوار عادية جدًا، وأنا بحب أعمل أدوار تسيب علامة حتى لو بسيطة، مش بحب أشتغل لمجرد الظهور، بحب أسيب بصمة يفتكرها الجمهور.
وجه كلمة أخيرة لجمهورك؟
إن شاء الله مسلسل كلهم بيحبوا مودي يعجب الناس ويكون 2026 سيزون ناجح بكل أعماله، وأتمنى دايمًا أكون عند حسن ظن الجمهور، وأقدم أعمال تليق بيهم وتفرحهم.
لمتابعة التفاصيل الكاملة حول مصطفى عباس يكشف كواليس دوره في "كلهم بيحبوا مودي" ويؤكد: شقي الحارة يجسد روح المصريين البسطاء، يمكن الرجوع إلى موقع مصر تايمز عبر رابط الخبر الموجود أسفل النص، وذلك حرصًا على وصول القارئ للمصدر الأصلي.