فرح الزاهد: شخصية سعاد في مسلسل لينك تجسد معاناة حقيقية لنساء يواجهن العنف النفسي
استطاعت
الفنانة فرح الزاهد
أن تتألق مؤخرًا من خلال شخصية سعاد في مسلسل لينك، المرأة التي تعاني من العنف النفسي، والتي تُمثل نموذجا حقيقيا لمعاناة العديد من السيدات في المجتمع.
كما استطاعت فرح الزاهد بأدائها القوي أن تجعل الجميع يتعاطف معها ويشعر بوجعها، خاصة بعد العديد من المشاهد المؤثرة التي أظهرت فيها براعتها بتقديم ردود فعل صادقة لفتت من خلالها الأنظار.
وتحدثت فرح الزاهد في حوار خاص لـ
"مصر تايمز"
عن تفاصيل الشخصية والمشاهد الصعبة التي مرت بها أثناء التصوير، بالإضافة إلى ردود الأفعال التي وصلت لها من الأمهات، وإلى نص الحوار.
في البداية.. حديثنا عن سبب اختيارك شخصية سعاد؟
اللي جذبني فيها إنها أم وزوجة بتمثل ستات كتير في المجتمع، ستات يتعرضون لعنف نفسي، ويفضلوا يقدموا كل حاجة للي حواليهم من غير تقدير، الشخصية قريبة جدًا من الواقع، خصوصًا إن جوزها في المسلسل متجوز عليها، وهي اللي تشتغل وتصرف على بيتها، فالموضوع مؤلم لكنه واقعي جدًا.
هل المسلسل ركز على نوع معين من العنف ضد المرأة؟
مسلسل لينك وضح أن العنف مش لازم يكون جسدي، ممكن يكون نفسي، والعنف النفسي أصعب بكتير لأنه محدش بيحس بيه غير الست نفسها، واللي بيعانوا منه لما يروحوا يقولوا لأهلهم "عايزة أتطلق" الناس ترد تقول "جوزك كويس"، لأنهم مش شايفين اللي بتحسه.
هل شخصية سعاد مستوحاة من قصة حقيقية؟
شخصية سعاد حقيقية جدًا، وهي قريبة المؤلف، هي اللي حكتلي قصتها، وقابلتها قبل التصوير، الست دي اشتغلت أوبر علشان تصرف على عيالها، وجوزها مقدّرش ده واتجوز عليها، فالقصة كلها من الواقع.
ما هي أكثر المشاهد الصعبة التي واجهتك أثناء التصوير؟
في مشاهد كتير كانت صعبة عليا نفسيًا، لكن أصعبهم كان مشهد اكتشاف الخيانة لما عرفت إنه متجوز عليا ومراته حامل، كنت منهارة فعلًا وقتها.
كمان في مشهد بكيت فيه بجد، ومامت الطفل اللي المفروض ابني كانت بتعيط معايا وقالتلي: "إزاي طلعتي مشاعر الأمومة دي؟"، خصوصًا إني مش أم في الحقيقة.
وفي مشهد مع رانيا يوسف كان من أصعب المشاهد كمان، استمر حوالي 8 دقايق، كنت بحاول أسيطر على مشاعري بس فعلاً كنت بنهار.
ما تعليقك على ردود الأفعال بعد عرض المسلسل؟
مبسوطة جدًا، الأمهات بيوقفوني في الشارع يقولولي "إنتي حاسة بينا"، خصوصًا بعد المشهد اللي كنت بحكي فيه عن الأمومة، الناس كلها أشادت بيه وقالوا قد إيه كان حقيقي ومؤثر، وده أسعدني جدًا.
ماذا عن نوع الأدوار التي تحبي تقدميها؟
أنا دايمًا بحب أقدم دور يكون له معنى، يناقش قضية أو موضوع مهم، مش بهتم بالشهرة في حد ذاتها، اللي يهمني إني أعمل حاجة تفيد الناس وتسيب أثر.
لمتابعة التفاصيل الكاملة حول فرح الزاهد: شخصية سعاد في مسلسل لينك تجسد معاناة حقيقية لنساء يواجهن العنف النفسي، يمكن الرجوع إلى موقع مصر تايمز عبر رابط الخبر الموجود أسفل النص، وذلك حرصًا على وصول القارئ للمصدر الأصلي.